278

wegen hanbthabenn unnd darnebenn unnſer Lannbtvogt der Newenmarck des ortts wie obſtett fein, unnd bie Amptsvorwanndtenn unnd unnſer underthann bey gleich unnd Recht ſchutzenn unnd vorteidingen, Idermann den vonn Adell purger unnd pawrnn arm unnd Reich, gleichenn ſchutz haltenn, Rechts geſtattenn unnd vorhelf­fenn, die gewonnlichenn ſtraſſenn fridſam vorteidingenn, Rauberey unnd plackereyenn nach feinem vormogenn weh­renn, kein geſchennck gifft noch gabe unns und den unſern zu ſchadenn fordernn noch nehmenn, keine vhede auß oder Inn unnſerm Ampt unnd Landen, on unſern wiſſenn unnd willenn nicht anfahenn noch niemants zu thun geſtattenn, Auch nicht hauſungk hegungk noch furſchub unnſer unnd unnſer nachpaurn feindt unnd beſchediger vorhenngen thun noch vorgonnen, Beſonnder unnſern ꝛc. ſchadenn verhuetenn unnd ſich In allwegk als einem getrewenn frommen Amptmann unnd Landtvogt zuſtett ertzeigenn unnd findenn laſſenn, wie er unns des auch pflicht gethann hatt unnd ſchuldigk if, Widerumb ſollen unnſer Amptsvorwandten unnd underthan Im als unn­ſerm Amptmann unnd Landtvogt, vonn unnſernn wegenn unnd Inn unſerm Nhamenn Inn allenn zimlichenn unnd billichenn ſachenn unnd unſernn geſchefftenn, wann er fie ermanenn unnd fordernn werdt, gehorſam gewer­tigk unnd gefolgigk ſein, Er ſoll ſie aber wider alltherkommenn Inn keinem wege beſchwerenn Noch nichts unge­wonlichs uflegenn. Unnd wir habenn Im uf volgennde perſonen, fo er Im Ampt Cuſtrin haldenn und Speiſſenn ſoll, vorordennt unnd verſprochenn, Nemlich uff ſein perſonn zweintzig guldenn, und uf die anndern perſonenn igliche zwelf guldenn unnd ſein das die perſonenn zwen Reyſige knechte, einen knabenn, zwen Wagenknechte, zwenn Wechter, einenn Thorwarter, einen koch, ein magt oder einen Jun— gen, das macht Inn einer Summen hundert unnd viertzigk guldenn, die habenn wir Ime vonn ſtundt Inn unnſer Ampt verwieſen wie folgt, vier unnd achtzig guldenn ann viertzehenn Winſpell Roggenn unnd viertzehenn Winſpel gerſtenn, den Winſpel zu dreien gulden angeſchlagen, noch dreiſig guldenn an den Wochennfiſch die er einnehmen und In feinen nutz gebrauchen magk. Item zweintzig gulden vor die gemeſten Schwein zu Landefs bergk die auch kaphengſt angeſchlagenn geweſt auß unſerm Ampt volgenn unnd die Schwein unns bleibenn ſollenn, dartzu zur ubermaß Siebentzehenn Allt Schaf, den fleiſchzehenden one die Lemmer die da gefallenn Inn unſer Scheffereien, Item ein vierteill Compoſt auß iglicher Scheffereien, Item ein dreyling Honigk zu pachte vonn der Tanger zu Maſſin, So aber ye zu Zeittenn unnſer landreiter Inn unſern geſchefften zu Cuſtrin kommen, ſoll er Inen die Coſtungk gebenn, die holtzung zu feiner feurungk ſoll er ſich Inn der Quartziſchenn heidenn erholenn nach altem herkommen, daſſelb holtz In unſer wagenpferdt Inn unſer Ampt unnd nicht weiter fhuren ſollenn, Doch alſo das unnſer geſchefft unnd arbeitt dadurch nicht vorhindert werbenn, unnd wo er mit dem holtz nicht kann zu kommen, Soll Im unnſer Caſtner etlich holtz wie vor geſcheenn kauffenn, die prebende und maltzeiten ſoll er nach allter gewonnheit dem Schulmeiſter und prieſtern gebenn, Auch Soll gnanter unſer Amptman unns vier geruſte pferdt Im Ampt haltenn, damit er unns zu iglicher Zeitt dinſt gewertig fein unnd ſich Inn unnſern geſchefftenn gebrauchenn laſſenn fol, uf dieſelbenn vier geruſtenn pferdt Im unſer Caſtner Jerlichenn zweintzig winſpel havern Reichen unnd gebenn ſoll, dartzu ſovil hews unnd ſtroes als er zu erhaltungk ſolcher pferdt notturfftigk, dartzu nagel unnd Eyſenn, Hofkleidung wollenn wir Im uf ſolch vier geruſte pferdt gebenn wie andern unſern Amptlewtenn, doch fein perſon mit gantzer kleidungk vorſehenn, Auch vor pferdt ſchadenn ſtehenn, Nemlich das pferdt uf fein perſonn fur Sechtzig gulbenn, des Jungen pferdt fur funfftzig guldenn unnd der knechte pferd iglichs fur funf und dreiſig guldenn unnd nachdem wir gnanten unſern Hauptman auch vorordent und bevolhenn haben, Als wir Im auch hiermit gegenwertiglich bevelhenn, die kandvogtey Inn unnſer Newemarck des ortts wie unnd In maſſen unnſer Rath Aſmus Sch o­nenbeck Inn bevelch gehabt zu vorweſenn, unnd unſer underthan von unſern wegenn zu gleich und Recht zu handthaben zu ſchutzenn unnd iedermann Rechts geſtattenn unnd vorhelffenn wie vorberurt iſt, darumb wollenn wir ſamptlich von beiderſeits Ampten Im Achtzig guldenn Reiniſch, zu itzlicher Zeitt uf oſternn durch unſern Caſtner zu Cuſtrin, ſampt den Zoll hecht gebenn unnd volgenn laſſen, Was aber daruber, fo fein Deputat iſt wie obſtett Inn unnſerm Ampt unnd des ortts der Landtvogteien ann nutzungen, Zinſen, pechten, Buſſen,